Գլխավոր
/
ՏԻՄ
/
Կրթություն
18.08.2025թ
«Շարա Տալյանի անվան երաժշտական դպրոց»
«Շարա Տալյանի անվան երաժշտական դպրոց»
Շարա Տալյանի անվան թիվ 2 երաժշտական դպրոցը հիմնադրվել է 1965թ. օգոստոսի 28-ին ՀՍՍՀ կուլտուրայի մինիստրության հրամանագրով և Էդ. Կզարթմյանի անմիջական նախաձեռնությամբ՝ որպես թիվ 1 երաժշտական դպրոցի մասնաճյուղ, տնօրեն՝Ա. Ավետիսյան
Բնակելի շենքի նկուղային հարկում դպրոցը 2 սենյակ էր զբաղեցնում : Հիմնականում դպրոց էին հաճախում քիմիագործների, մետաքսագործների ,հաստոցաշինարարների երեխաները:
1966թ. սեպտեմբերի 1-ից դպրոցը դարձավ ինքնուրույն միավոր և տնօրեն նշանակվեց Ամալյա Վարդապետյանը, ուսմասվար՝ Թամարա Փերոյանը:
Դպրոցում աշխատում էին բանիմաց և հեղինակություն վայելող դասատուներ, ովքեր թրծվել էին թիվ 1 երաժշտական դպրոցում:Չնայած դպրոցի անհրապույր պայմաններին ՝ աշխատանքային հաճելի մթնոլորտ էր ձևավորվել, և առողջ ու մտերմիկ կոլեկտիվում աշխատում էին 36 երիտասարդ ուսուցիչներ՝ դաշնամուրային , լարային, փողային և ժող գործիքների բաժիններում: Տարեցտարի ավելանում էին դասատուների և աշակերտների թիվը և դպրոցի տարածքն այլևս չէր բավարարում:
Բազմաթիվ ծնողների կողմից իշխանությունների հղված դիմումներին ընդառաջելով՝Կիրովականի քաղսովետի և ՀԿԿ քաղկոմի որոշմամբ դպրոցին տրամադրվեց Բաթումի 9 հասցեում գտնվող շինարարներին և տրիկոտաժագործներին պատկանող հանրակացարանի առաջին հարկը, հետագայում՝ արդեն ամբողջ շենքը,իսկ հանրակացարանի բնակիչները ապահովվեցին բնակարաններով:Շենքի հիմնանորոգումից հետո, երբ ստեղծվեցին հարմարավետ ու լուսավոր դասասենյակներ, ՀՍՍՀ կուլտուրայի մինիստրության կողմից հատկացվեց գույք և երաժշտական գործիքներ:
Դպրոցի տնօրեն Ա. Վարդապետյանի և ուսմասվար Թ. Փերոյանի կազմակերպչական հմտությունների շնորհիվ էլ ավելի բարձրացավ դպրոցի հեղինակությունը: Աճել էր երաժիշտ մանկավարժների մի սերունդ , որին կարելի էր հավատալ և վստահել՝ Լաուրա Ղամբարյան, Ժաննա Միքայելյան, Թամարա Մելիքյան, Լեյլի Ավետիսյան ,Աիդա Մելիքյան, Հայկարամ Անտոնյան, Վիոլետա Բեժանյան, Նելլի Գրիգորյան և շատ ուրիշներ. Այս ցանկը կարելի է անվերջ շարունակել
Նրանք մեծագույն գնահատանքին արժանացած մարդիկ են , ում քրտնաջան աշխատանքի շնորհիվ դպրոցը ունեցավ մեծ ձեռքբերումներ, ձևավորվեցին ավանդույթներ. որոնց հավատարիմ ենք մնում այսօր ևս :Շուտով դպրոցը հասավ այնպիսի մակարդակի, որ կարող էր մրցակցել մայրաքաղաքի ցանկացած երաժշտական դպրոցի հետ: Ասվածի վկայությունն է 1969թ. Կոմիտասի և Թումանյանի 100 ամյակներին նվիրված հանրապետական ստուգատեսը, երբ մեր դպրոցի կրթական բարձր որակին շատերն էին տեղյակ և սպասված էին կոմիտասյան Հորովելի , Կռունկի կատարումները մեր դպրոցի դաշնամուրային և լարային բաժինների աշակերտների կողմից:
1971թ երբ նշվում էր դպրոցի 5 ամյակը, դպրոցն անվանակոչվեց մեծանուն երգիչ ՀՍՍՀ ժողովրդական արտիստ Շարա Տալյանի անվամբ:
1973թ. դպրոցը հրաժեշտ տվեց իր առաջին շրջանավարտներին, որոնցից շատերն իրենց ուսումը շարունակեցին Կիրովականի երաժշտական ուսումնարանում, ապա Երևանի Պետական Կոնսերվատորիայում՝ դառնալով մեր քաղաքի երաժշտարվեստի իսկական նվիրյալներ:Նրանցից ոմանք աշխատում են հարազատ դպրոցում՝ Միքայել Աբրահամյան,
1976թ. երբ դպրոցը բոլորեց իր գոյության 10 տարին, դպրոցի բակում տեղադրվեց Շարա Տալյանի կիսանդրին, հեղինակ՝ Ալիս Մելիքյան: Այդ ժամանակ դպրոցում արդեն աշխատում էին 120 դասատու, սովորում՝ 470 աշակերտ տարբեր բաժիններում: Դպրոցում գործում էին ուսուցչական և աշակերտական երգչախմբեր , թավջութակահարների , ջութակահարների և ժող գործիքների համույթներ:
Դպրոցը ակտիվ գործունեություն էր վարում՝ բազմաթիվ փնջային համերգներ, մրցույթ-ստուգատեսներ, փառատոններ…և արդյունքում՝ անթիվ պարգևներ , մրցանակներ:
Եվ սա դեռ բոլորը չէ:Դպրոցը բարեկամական կապեր ուներ նախկին ԽՍՀՄ-ի շատ հանրապետությունների հետ.
Փոխադարձ այցելություններ էին կատարվում, ցուցադրում առաջավոր փորձը Մոսկվայում, Ռիգայում, Բաթումիում և այլուր:
Մեր ուսուցիչները պարբերաբար վերապատրաստվում էին Հանրապետական մեթոդ-կաբինետի լավագույն մասնագետների կողմից՝ էլ ավելի հարստացնելով իրենց գիտելիքները:
Հիմնադրման օրից դպրոցում աշխատել են 7 տնօրեններ՝ կոմպոզիտոր Աիդա Ավետիսյան, վաստակավոր մանկավարժներ Ամալյա Վարդապետյան, Սեդա Ղազարյան, Խաչատուր Դնոյան , ում հաջորդեցին Միքայել Աբրահամյանը,ապա Անահիտ Խանզադյանը:
2019 թվականին<<Վանաձոր համայնքի Շարա Տալյանի անվան երաժշտական դպրոց ԿՈԻՀ>> ՀՈԱԿ-ի տնօրենի ժամանակավոր պաշտոնակատար է նշանակվել Աննա Միրզոյանը:
1999 թվականից առ այսօր դպրոցում ուսումնական գծով տնօրենի տեղակալ է Մելանյա Աբազյանը:
1988թ. ահեղ երկրաշարժն իր ավերիչ կնիքը դրեց նաև թիվ 2 երաժշտական դպրոցի վրա : Խիստ վթարված շենքը քանդեցին ՝ վերակառուցելու նպատակով, սակայն այդպես էլ չվերակառուցվեց, և դպրոցը , որ շուրջ 25 տարի հանգրվանել էր տարեցտարի քայքայվող տնակներում , շարունակում էր աշխատել բնականոն ռիթմով ՝ այս անբարենպաստ պայմաններում՝ ապահովելով գնահատանքի արժանի աշխատանք:
Դրա պարզ վկայությունն է 1994թ Ամադեուս պատանի երաժիշտների մրցույթ փառատոնը, որտեղ մեր աշակերտները բազմաթիվ մրցանակներ ստացան :
2008թ Բաբաջանյանի անվան 8-րդ մրցույթ փառատոն – հատուկ մրցանակ :2009թ Գ.Սարաջևի անվան 5-րդ մրցույթ փառատոն- 2-րդ կարգի մրցանակ : Գ. Թալալյանի անվան պատանի թավջութակահարների մրցույթ փառատոն- 2-րդ կարգի մրցանակ :
2013թ Երգող Հայաստան երգչախմբային մրցույթ փառատոն -3-րդ կարգի մրցանակ և դրամական պարգև :
2014թ.<<Վանաձորյան ձայն >> մրցույթ փառատոն -1-ին մրցանակ :
2015թ միջազգային << Վերածնունդ>> փառատոն Գյումրիում – 3-րդ մրցանակ
Քաղաքապետարանի մշակույթի բաժնի կողմից կազմակերպված <<Կոմիտաս>> պատանի երաժիշտ կատարողների մրցույթ փառատոն-1-ին և 2-րդ կարգի մրցանակներ:
2019 թվական Մեղեդի 2 մրցույթ-փառատոն՝ Մեծ մրցանակ:
Արտ Մյուզիք միջազգային մրցույթ-փառատոն ՝1-ին և 2-րդ կարգի մրցանակներ:
Խաչատուր Ավետիսյանի անվան մրցույթ՝ 1-ին և 2-րդ կարգի մրցանակներ:
Այս ամենը մեր ուսուցիչների անուրանալի ձեռքբերումներն են:
59-ամյա իր պատմության ընթացքում դպրոցը տվել է 2000 շրջանավարտ , որոնցից շատերը հայտնի երաժիշտներ են, ովքեր աշխատում են հանրապետության տարբեր երաժշտական հաստատություններում, ոմքանք էլ կայացել են գիտության տարբեր բնագավառներում, ստանալով գիտական բարձր կոչումներ :
59-ամյա կենսագրություն և հարուստ ավանդույթներ ունեցող Շարա Տալյանի անվան երաժշտական դպրոցն այսօր էլ շարունակում է գործել հպարտության զգացումով, որովհետև տարիների հոլովույթի մեջ պատվով ու պատասխանատվությամբ կրթել ու երաժշտարվեստի լուսե դռներն է բացել բազմաթիվ երեխաների առջև , հղկել է նրանց մանկական հոգիները:
Հասցե՝ ՀՀ Լոռու մարզ, ք․ Վանաձոր Վարդանանց 41
Հեռ.՝093653874
Տնօրեն՝ Աննա Միրզոյան