Մոլդովայի Հանրապետության Քիշնև քաղաքում անցկացված «Քաղաքապետերի դաշնագիր Արևելյան գործընկերության տարածաշրջանում» (CoM East) բարձր մակարդակի համաժողովի շրջանակում ամփոփվել են Ազգային SECAP մրցույթի արդյունքները, որոնց համաձայն Վանաձոր համայնքը ճանաչվել է մրցույթի հաղթողներից մեկը։

«Քաղաքապետերի դաշնագիր Արևելք» ծրագիրը Եվրոպական միության աջակցությամբ իրականացվող նախաձեռնություն է, որը միավորում է Արևելյան գործընկերության երկրների համայնքներին՝ աջակցելով կլիմայական փոփոխությունների դեմ պայքարին, էներգաարդյունավետության բարձրացմանը, վերականգնվող էներգիայի կիրառմանը և կայուն զարգացման քաղաքականությունների իրականացմանը։ Ծրագրի շրջանակում համայնքները մշակում և իրականացնում են Կայուն էներգիայի և կլիմայի գործողությունների ծրագրեր (SECAP)՝ ուղղված ջերմոցային գազերի արտանետումների կրճատմանը և կլիմայական փոփոխությունների նկատմամբ համայնքների դիմակայունության բարձրացմանը։

Ազգային SECAP մրցույթին մասնակցել են Հայաստանի, Ադրբեջանի, Մոլդովայի և Ուկրաինայի համայնքները։ Ներկայացված 67 հայտերից անկախ փորձագիտական ժյուրիի գնահատման արդյունքում հաղթող են ճանաչվել ութ համայնքներ, այդ թվում՝ Վանաձորը։

Հաղթող համայնքները կստանան մինչև 1,000 եվրո արժողությամբ վաուչեր՝ հետագա բնապահպանական և իրազեկման միջոցառումների իրականացման համար, ներառյալ ծառատնկման ծրագրերը և համայնքային իրազեկման արշավները։

Վանաձորի հաղթանակը համայնքում իրականացվող կայուն զարգացման, էներգաարդյունավետության և կլիմայական քաղաքականությունների ոլորտում տարվող հետևողական աշխատանքի կարևոր գնահատականն է և նոր խթան՝ շարունակելու համայնքի դիմակայուն և կանաչ զարգացմանն ուղղված նախաձեռնությունները։